差不多11點﹐我係唐人街嘆完個早餐
三姑爸話要行去買6合彩。
途中﹐聽見有人好大聲鬧緊
我以為係兩條友鬧交啦~

地點﹕
唐人街某麵包店

人物﹕
一個中年人﹐大概係30-40歲左右﹐操流利廣東話 (似係麵包師父)
一個亞伯﹐約60-70歲﹐無出過聲。
一個包店職員﹐約40-50歲。
10多位圍觀人 (包括三姑爸 -_-﹔ )

三姑眼見經過﹕
中年人在10多人圍觀下破口大大聲鬧 (真係好大聲﹐我街尾已經聽到)
“我X 你老母﹗你有無搞X錯﹖X家X 你話﹗
日X日都黎﹐你痴X線架﹖
唔係見你老呀﹐我打X左你喇﹗
你咪再黎呀﹗我報警架﹗”

起初我心諗﹐咩事要用咁多粗口黎鬧一個亞伯呢﹖
個亞伯一直無出過聲﹐淨係由一間麵包店走出黎
我真係覺得好無陰公﹐咁樣鬧一個亞伯

之後就有一位麵包店職員講喇﹕
佢日日都黎偷麵包架﹗咩都偷﹐係唔偷叉燒包 (乜咁揀飲擇食﹖)
路人甲﹕佢有病架﹖
包店職員﹕係呀﹗傻架佢﹗日日都黎架真係﹗仲帶埋個袋黎添﹗我特登等佢偷完先追佢﹐有證有據比人睇丫嘛﹗
中年人﹕唔係因為佢老﹐我打左佢喇﹗打左佢又無用﹗見大家都唐人﹐佢又老先費事報警咋﹗佢有病架﹗
路人甲﹕日日都黎偷架﹖
包店職員﹕係呀﹗見佢老人家先費事報警咋﹗我都有老豆架﹐都唔想打個老人家啦~ 但佢日日都黎偷﹗

人群開始散開。。。。

我係中年人講緊“唔係因為佢老” 既時候
就望住個亞伯﹐佢毫無表情咁行去一個垃圾筒
打開麵包店職員所講既袋﹐睇下有咩執
之後就轉左入橫街。。。。。。

其實個一刻我係度諗左好多野
做咩要咁鬧個亞伯呢﹖好無陰公姐~
一個麵包又唔係貴﹐做咩唔比個佢食呢﹖
況且麵包店一日掉咁多麵包
施捨一個包比人都無所謂啦~
但係我又諗﹐施捨得一個﹐就會接住有第二個第三個
咁樣又做唔到生意既﹗
不過都唔洗咁鬧個亞伯丫﹗
洗乜鬧人X 家鏟呢﹖睇黎個亞伯都唔會有家人。。。。

咁Q﹐我手上有兩袋麵包
我真係好想行去請一個佢食
但係結果都無行到
因為我覺得比左佢
都唔知係幫定係害左佢﹖

另外我好唔明
既然麵包店職員已經認得個亞伯
做咩仲要等個亞伯偷完野先捉黎鬧﹖
何不直頭唔歡迎佢入店咪得囉﹖

如果你係我﹐你又會點諗﹖
如果你係麵包店職員﹐你又會點做呢﹖

個人覺得o個位老人家未必係有病, 好大可能係家庭環境唔太好, 而屋企人亦無時間照顧, 所以先會咁做. 好多時從新聞/forum都見過有部份老人家, 因為想減輕年輕人的負擔, 所以會周街搵紙皮/氣水罐變買, 賺少少錢幫保一下.

間鋪頭的做法原則上無錯, 一個包唔算值錢, 但日日一個, 比得一個就有第2 個黎拎, 所以認同唔可以算數. 但對一個人家爆粗就有點過份... 應該試同佢屋企人聯絡, 亦應該留心唔再歡迎佢入內, 好過咁做! 如果外人經過唔知前因後果, 只會比人覺得華人係咁粗聲粗氣 (外國人好介意, 亦好lable全部華人都係咁)

三姑 :
你講得無錯﹐但減輕負擔﹐我覺得都唔需要去偷野嘛~ 所以我偏向信亞伯有病。。。

我會覺得間舖頭冇做錯..
只係唔需要用粗口鬧佢咁..
但係如果比著我係個老闆..
我都唔知報唔報警好..
因為個阿伯成日去偷野都唔係辦法..
去唔到呢間偷就去第二間..
如果報左警..係咪會有人跟進?
例如個阿伯真係有需要會有社工照顧佢..
唔報警由得佢..第日偷著d 惡人野..
咁會唔會真係比人打傷或者打死?

三姑 :
如果報左警..係咪會有人跟進都成問題﹗差佬只會做差佬既野﹐點會理其他丫﹗

我多數會睇完就算
個心係唔安樂，但係我地可以點幫佢呀？
幫得一次，下次點算呢？
每日都有好多慘既人0係身邊行過，大家都係人，點解有人要過得咁慘？
越打越唔識講啦，希望有d機構可以幫下佢地啦。。。。。

呢個老人家其實係社會中ge必需要有的人物.

喺日常生活中都見得多.唔奇怪.

唉 ! 睇完呢單想講o下某次同班回流o既同學茶聚 ,
其中有個同學就講 : 點解有次我去快餐店食野 ,
隔壁桌企住個正伯 , 係人地走o左之後 ,
個伯伯就跟住坐低食人地食淨o既食物 ...
佢問我地hk近年經濟唔係好番咩 !? 咁點解 ???

呢件事令我想起多年前 ,
放工後途經某快餐店門外(唔係連鎖) ,
見到有個婆婆問個店員可唔可以俾d白飯佢食 ,
經問準店主後個婆婆唔止有白飯仲有d菜俾埋佢 ...

我相信係繁華都市背後有好多唔同o既故事 ,
但更加相信 "人間有情 " ,
可以幫助他人都係自己o既福條o黎 !