(明報)1月16日 星期五 05:05

【明報專訊】任何一個政治人，當然想得到別人讚賞同掌聲。講起「掟蕉」，大家都會記得去年立法會「開鑼」時，社民連主席黃毓民喺議事廳內「一蕉成名」。事隔3個月，噚日立法會答問大會上，「掟蕉」行為重現，今次主角卻換了是財爺曾俊華 ，事緣大會未開始前，「長毛」梁國雄突然向財爺「掟蕉」，但今次唔係真香蕉，而係「香蕉雙截棍」。有習武底子嘅財爺毫無懼色，之後仲大力「還蕉」，掟返畀長毛。

除咗面對「掟蕉」挑戰外，噚日特首煲呔同埋班子成員，係安坐議事廳前，佢哋先要經過立法會大樓門外示威區嘅噓聲「洗禮」。

高官特首立會外被狂噓

答問大會晏晝3點開始，開始15分鐘，政府人員陸續到場，比較早到場嘅商務及經濟發展局長劉吳惠蘭算好彩，未有被噓，但之後財政司長曾俊華到場，示威者嘅情緒開始激動，噓聲四起，跟住嘅律政司長黃仁龍 、財經事務及庫務局長陳家強 、公務員事務局長俞宗怡及民政事務局長曾德成 無一倖免，全被大噓特噓。

相比起來，食物及衛生局長周一嶽就醒目得多，座駕停喺另一個門口，離示威區較遠，避過噓聲「招呼」。而高潮所在當然係煲呔駕到，全場噓聲不絕，但煲呔好識做，走到示威區前接咗4封信，先入立法會大樓。不過就Emily所見，煲呔接信前應該做好一切安全評估，除咗有鐵馬隔開示威者，仲有至少3名G4陪伴在旁，可謂「零」風險。

Coolio :
these guys are determined to turn 立法會 into a 香蕉俱樂部. LOL